சத்தியம் விடுதலையாக்கும்

test

கிறிஸ்தவர்களுக்கு ஒரு நன்மையும் குறைவு படாதா??

சங்கீதம் 34:10
சிங்கக்குட்டிகள் தாழ்ச்சியடைந்து பட்டினியாயிருக்கும்; கர்த்தரைத் தேடுகிறவர்களுக்கோ ஒரு நன்மையுங்குறைவுபடாது.

ஒரு பிரசங்கியாரின் ஒரு பிரசங்கத்தை கேட்க நேர்ந்தது. அதில் கர்த்தரை தேடுபவர்களுக்கு வரும் ஆசீர்வாதங்கள் என்னென்ன என பேசியவர் தன் முதல் குறிப்பாக மேலுள்ள வசனபகுதியை காண்பித்து கர்த்தரை தேடினால் உலகம் முழுவதும் பஞ்சம் வந்தாலும் உங்கள் வீட்டில் சாப்பாடு இருக்கும், உலகம் முழுதும் பெட்ரோல் தீர்ந்து போனாலும் உங்கள் வண்டி ஓடும் என அளந்து விட்டார். இது சரியா?

இது சரியென்றால் முதல் நூற்றாண்டில் கர்த்தரை தேடிய கிறிஸ்தவர்களுக்கு எந்த பிரச்சனையும் வந்திருக்காதுதானே.
அன்று எருசலேமில் பஞ்சம் வந்தபோது அங்கே இருந்த கிறிஸ்தவர்களும் பாதிக்கப்பட்டார்கள். ஆகவே தான் பவுல் தர்மசகாயம் அனுப்பும்படி தன் கடிதத்தில் குறிப்பிட்டுள்ளார்.

(1 கொரிந்தியர் 16:1
பரிசுத்தவான்களுக்காகச் சேர்க்கப்படும் தர்மப்பணத்தைக்குறித்து நான் கலாத்தியா நாட்டுச் சபைகளுக்குப்பண்ணின திட்டத்தின்படியே நீங்களும் செய்யுங்கள்.)

பவுல் கர்த்தரை தேடினவன்தானே பின் பவுல் ஏன் பட்டினியாயிருந்தார்? குறைச்சலில் இருந்தார்? அப்போ அன்றைக்கு பட்டினியாக இல்லாதவர்கள் கர்த்தரை தேடினவர்களாகவும் பட்டினியாக இருந்த பவுல் கர்த்தரை தேடாதவராகவும் காணப்பட்டாரா?
பவுல் திருப்தியாக இருக்க மட்டுமல்ல பட்டினியாக இருக்கவும், நிறைவாயிருக்க மட்டுமல்ல குறைவாயிருக்கவும் போதிக்கப்பட்டார். அப்படியானால் சங்34:10 ன் படி உலகமெல்லாம் பஞ்சம் வந்தாலும் பவுலுக்கு பட்டினி வராது சாப்பாடு இருக்கும் என்ற வெளிப்பாடு கிடைக்கவில்லையா என்ன?

(பிலிப்பியர் 4:12
தாழ்ந்திருக்கவும் எனக்குத் தெரியும், வாழ்ந்திருக்கவும் எனக்குத் தெரியும்; எவ்விடத்திலும் எல்லாவற்றிலும் திருப்தியாயிருக்கவும் பட்டினியாயிருக்கவும், பரிபூரணமடையவும் குறைவுபடவும் போதிக்கப்பட்டேன்.)
பவுல் போதிக்கப்பட்டதற்கும் இன்றைய கிறிஸ்தவர்கள் போதிக்கப்படுவதற்கும் எவ்வளவு வித்தியாசம்

மேலும் எபிரேய ஆசிரியர் கர்த்தரை தேடிய பலர் குறைவை அனுபவித்தார்கள் என்கிறாரே. குறைவை மட்டுமல்ல அதை விட தீவிரமான துன்பங்களை அனுபவித்தார்கள்
(எபிரெயருக்கு எழுதின நிருபம் 11:36-38
வேறு சிலர் நிந்தைகளையும் அடிகளையும் கட்டுகளையும் காவலையும் அநுபவித்தார்கள்;
கல்லெறியுண்டார்கள், வாளால் அறுப்புண்டார்கள், பரீட்சைபார்க்கப்பட்டார்கள், பட்டயத்தினாலே வெட்டப்பட்டு மரித்தார்கள், செம்மறியாட்டுத் தோல்களையும் வெள்ளாட்டுத் தோல்களையும் போர்த்துக்கொண்டு திரிந்து, குறைவையும் உபத்திரவத்தையும் துன்பத்தையும் அநுபவித்தார்கள்; உலகம் அவர்களுக்குப் பாத்திரமாயிருக்கவில்லை; அவர்கள் வனாந்தரங்களிலேயும் மலைகளிலேயும் குகைகளிலேயும் பூமியின் வெடிப்புகளிலேயும் சிதறுண்டு அலைந்தார்கள்.)

மேலும் பல மிஷ்னரிமார் வாழ்க்கையை பார்த்தால் இன்று பிரசங்கித்த பிரசங்கியாரின் கூற்றுப்படி பல மிஷ்னரிமார்கள் கர்த்தரை தேடாதவர்கள் என்ற முடிவுக்கு வரலாமா?

வெறும் இன்றைய காலத்தில் நான் வாழும் வாழ்க்கையை வைத்து எனக்கு எந்த குறைச்சலும் இல்லை ஆகையால் கர்த்தரை தேடுகிற யாருக்கும் எந்த குறைச்சலும் வராது என நினைத்து பழைய ஏற்பாட்டு வசனங்களை வைத்து மக்களிடம் பொய் கூற கூடாது.

இந்தியா முழுவதும் மோடியின் பணமதிப்பிழப்பால் பொதுமக்கள் பாதிக்கப்பட்ட போது கிறிஸ்தவர்களுக்கு (கர்த்தரை தேடுகிறவர்களுக்கு) மட்டும் எந்த பாதிப்பும் வரவில்லையா? சோமாலியா போன்ற நாடுகளில் கர்த்தரை தேடாதவர்களுக்கு மட்டும் தான் பஞ்சம் உள்ளதா?

கர்த்தரை தேடினால் என்ன நன்மை கிடைக்கும் என சொல்லி அதனால் தேடுங்கள் என்பது கிறிஸ்தவ உபதேசமே ஆகாது.

நாம் ஏன் கர்தரை தேட வேண்டும்?
அவர் முதலில் என்னை தேடி வந்து தன் அன்பை விளங்கப்பண்ணினதால்.
கர்த்தரை தேடினால் என்ன கிடைக்கும்?
கர்த்தரே கிடைப்பார் அதை விட வேறென்ன‌ வேண்டும்.

கர்த்தரை தேடினால் நன்மை குறைவுபடாதா? ஆம். என்ன நன்மை?

மத்தேயு 7:11.. பரலோகத்திலிருக்கிற உங்கள் பிதா தம்மிடத்தில் வேண்டிக்கொள்ளுகிறவர்களுக்கு நன்மையானவைகளைக் கொடுப்பது அதிக நிச்சயம் அல்லவா?

லூக்கா 11:13
, பரமபிதாவானவர் தம்மிடத்தில் வேண்டிக்கொள்ளுகிறவர்களுக்குப் பரிசுத்த ஆவியைக் கொடுப்பது அதிக நிச்சயம் அல்லவா என்றார்.

கர்த்தரை தேடுகிறவர்களுக்கு அவர் பரிசுத்த ஆவியானவரையே கொடுத்து விட்டார். இதை விட பெரியதா உலக காரியங்கள்?

ஆம் நாம் நமக்கு தேவை என்று நினைத்து பல காரியங்களை தேவனிடம் கேட்கலாம். ஆனால் நமக்கு எது தேவையோ (பிதாவின் சித்தப்படி) அதற்கேற்றபடி நம்மை நடத்தவும் நமக்காக சரியாக வேண்டவும் செய்கிறார் பரிசுத்த ஆவியானவர். அந்தபடி குறைச்சல் கூட நன்மையாக இருக்க வாய்ப்பு உண்டு. உலகமே செழிப்பில் இருந்தாலும் கர்த்தரை தேடுகிற ஒருவனுக்கு மட்டும் ஏற்படும் பட்டினி கூட அவனது நன்மையாக இருக்க வாய்ப்பு உண்டு. பவுலுக்கு மாம்சத்திலே ஒரு முள் கொடுக்கப்பட்டது. அது நீங்க வேண்டும் என்பது பவுலின் விருப்பம். ஆனால் தேவன் அதை செய்யவில்லை. இங்கே பவுலது இந்த முள் அல்லது பலவீனம் அவனுக்கு நன்மைதான்.

என்ன நன்மை? அதிக வெளிப்பாடு பெற்றதன் நிமித்தம் தன்னை பெருமைபடுத்தி விட கூடாது என்ற நன்மை

இந்த பலவீனத்தையும் தாங்கும்படியாக தேவ வல்லமை பவுலின் மேல் தங்கத்தக்கதான தேவ கிருபை கிடைத்தது நன்மை

(2 கொரிந்தியர் 12:7
அன்றியும், எனக்கு வெளிப்படுத்தப்பட்டவைகளுக்குரிய மேன்மையினிமித்தம் நான் என்னை உயர்த்தாதபடிக்கு, என் மாம்சத்திலே ஒரு முள் கொடுக்கப்பட்டிருக்கிறது; என்னை நான் உயர்த்தாதபடிக்கு, அது என்னைக் குட்டும் சாத்தானுடைய தூதனாயிருக்கிறது.

2 கொரிந்தியர் 12:9
அதற்கு அவர்: என் கிருபை உனக்குப்போதும்; பலவீனத்திலே என் பலம் பூரணமாய் விளங்கும் என்றார். ஆகையால், கிறிஸ்துவின் வல்லமை என்மேல் தங்கும்படி, என் பலவீனங்களைக்குறித்து நான் மிகவும் சந்தோஷமாய் மேன்மைபாராட்டுவேன்.)

கர்த்தரை தேடுகிறவர்கள் வாழ்வில் நடக்கும் அனைத்தும் நன்மைக்கேதுவானவைகள். அது பட்டினியாகவே இருந்தாலும். கர்த்தரை தேடுகிறவர்களுக்கு இந்த நன்மைதான் ஒருபோதும் குறைவுபடாது.

(ரோமர் 8:28
அன்றியும், அவருடைய தீர்மானத்தின்படி அழைக்கப்பட்டவர்களாய்த் தேவனிடத்தில் அன்புகூருகிறவர்களுக்குச் சகலமும் நன்மைக்கு ஏதுவாக நடக்கிறதென்று அறிந்திருக்கிறோம்.)

ஆபிரமும் ஆபிராமின் சகோதரனுடைய மகனாகிய லோத்தும் கானானுக்கு வரும்போது ஒன்றாக வந்தார்கள். ஒன்றாக சம்பாதித்தார்கள். தற்போது இருவரும் ஒன்றாக குடியிருப்பதால் இருவரது வேலைக்காரர்களுக்குள்ளும் வாக்குவாதம் நடப்பதை கண்ட ஆபிராம், இப்படியே போனால் நாளை லோத்துவுக்கும் எனக்கும் கூட வாக்குவாதம் நேர வாய்ப்பு உண்டு, அப்படி சொந்த குடும்பத்துக்குள்ளேயே வாக்குவாதம் நடந்தால் சுற்றியிருக்கும் கானானியருக்கும் பெரிசியருக்கும் முன்பாக அது சாட்சி கேடாகும் என கருதி, லோத்துவை அழைத்து பிரிந்து செல்ல சொல்லி லோத்துவுக்கு விருப்பமான இடத்தை தேர்ந்தெடுக்கவும் சொல்கிறார்.

(ஆதியாகமம் 13:7-9
ஆபிராமுடைய மந்தைமேய்ப்பருக்கும் லோத்துடைய மந்தைமேய்ப்பருக்கும் வாக்குவாதம் உண்டாயிற்று. அக்காலத்திலே கானானியரும் பெரிசியரும் அத்தேசத்தில் குடியிருந்தார்கள். ஆபிராம் லோத்தை நோக்கி: எனக்கும் உனக்கும், என் மேய்ப்பருக்கும் உன் மேய்ப்பருக்கும் வாக்குவாதம் வேண்டாம்; நாம் சகோதரர். இந்தத் தேசமெல்லாம் உனக்குமுன் இருக்கிறது அல்லவா? நீ என்னைவிட்டுப் பிரிந்துபோகலாம்; நீ இடதுபுறம் போனால், நான் வலதுபுறம் போகிறேன்; நீ வலதுபுறம் போனால், நான் இடதுபுறம் போகிறேன் என்றான்.)

லோத்து மிக செழிப்பான பகுதியை தேர்ந்தெடுத்தார். தன் சித்தப்பா செழிப்பான இடத்துக்கு செல்லட்டும் என லோத்து நினைக்கவில்லை. மாறாக தனக்கே செழிப்பான இடம் கிடைக்க வேண்டும் என எண்ணினார்.

ஆனால் ஆபிராம் அப்படியல்ல, தனக்கு கிடைப்பது செழிப்பான இடமோ செழிப்பில்லா இடமோ, அது முக்கியமல்ல, குடும்பத்தில் சண்டை சச்சரவு இல்லாமல் வாழ்வது போதும் என நினைத்தார்.

ஆபிராம் அன்று லோத்து கேட்டதை விட்டுக்கொடுத்ததால் அவனது உறவு கெட்டுபோகவில்லை. ஒருவேளை ஆபிராம் விட்டுக்கொடுக்காமல் இருந்திருந்தால் ஆபிராமுக்கு செழிப்பான இடம் கிடைத்து இருக்கலாம். ஆனால் லோத்துவுக்கு அதனால் மனக்கசப்பு ஏற்பட்டிருக்க வாய்ப்பு உண்டு.

இயேசு கிறிஸ்து பூமியில் மனிதனாய் வாழ்ந்தபோது ஒருவன் வந்து தன் சகோதரனுடன் பஞ்சாயத்து பண்ணி தன் சொத்தை பெற்றுத்தர சொன்ன போது, இயேசு அதற்கு உடன்படவில்லை. மாறாக அந்நேரத்தில் தானே பொருளாசைக்கு எதிராக பாடம் எடுத்தார்.

(லூக்கா 12:13-15
அப்பொழுது ஜனக்கூட்டத்தில் ஒருவன் அவரை நோக்கி: போதகரே, ஆஸ்தியைப் பாகம்பிரித்து என் வீதத்தை எனக்குத்தரும்படி என் சகோதரனுக்குக் கட்டளையிடவேண்டும் என்று கேட்டுக்கொண்டான். அதற்கு அவர்: மனுஷனே, என்னை உங்களுக்கு நியாயாதிபதியாகவும் பங்கிடுகிறவனாகவும் வைத்தவன் யார் என்றார். பின்பு அவர் அவர்களை நோக்கி: பொருளாசையைக்குறித்து எச்சரிக்கையாயிருங்கள்; ஏனெனில் ஒருவனுக்கு எவ்வளவு திரளான ஆஸ்தி இருந்தாலும் அது அவனுக்கு ஜீவன் அல்ல என்றார்.)

இங்கே இயேசு கிறிஸ்துவிடம் வைத்த கோரிக்கை நிராகரிக்கப்பட்டது. மாறாக ஆஸ்தியை பங்கிடுகிறவனாக என்னை உங்களுக்கு வைத்தது யார் என்ற கேள்வியை முன்வைத்தார்.

ஆனால் இன்று அநேக கிறிஸ்தவர்கள் இதுபோன்ற விஷயங்களை தான் தேவனிடம் ஜெபம் என்ற‌ பெயரில் கோரிக்கையாக வைக்கின்றனர். அன்றைக்கு இயேசு கூறிய பதிலிலிருந்து மாற்றம் இருக்கும் என்று நினைக்கிறார்களோ என்னவோ.

அன்புக்குரியவர்களே உங்களுக்கு நியாயமாக கிடைக்க வேண்டிய விஷயமேயானாலும் வேறொருவரோடு சண்டையிட்டு பெற்றுக்கொள்ள வேண்டாம். சண்டை மூலம் பெற்றால் உறவை இழப்பீர்கள். ஆனால் விட்டுக் கொடுப்பதன்  மூலம் நஷ்டமடைந்தாலும் உறவை இழக்காமல் சம்பாதிப்பீர்கள். உறவா? சொத்தா?

ஆகவே தான் பவுல் கேட்கிறார். நீங்கள் ஏன் நஷ்டத்தை பொறுத்துக்கொள்ள கூடாது என்று.

(1 கொரிந்தியர் 6:7
நீங்கள் ஒருவரோடொருவர் வழக்காடுகிறது எவ்விதத்திலும் குற்றமாயிருக்கிறது. அப்படிச் செய்கிறதைவிட நீங்கள் ஏன் அநியாயத்தைச் சகித்துக்கொள்ளுகிறதில்லை, ஏன் நஷ்டத்தைப் பொறுத்துக்கொள்ளுகிறதில்லை?)

ஆம் வழக்காடி சண்டை போட்டு சகோதரத்துவத்தை இழப்பதை விட, நஷ்டமே அடைந்தாலும் விட்டுகொடுத்து சகோதரத்துவத்தை பேணுவது உங்கள் சாட்சி வாழ்வுக்கு ஏதுவாகும்.

சொத்து போனாலும் விட்டுக் கொடுத்தால் அன்பு கெட்டுபோவதில்லை.

☝🏿 இதை பின்பற்றுங்கள் அன்பே பிரதானம் எனில்.

சொத்து கிடைத்தாலும் விட்டுக்கொடுக்கா விட்டால் அன்பு கெட்டுபோகும்

☝🏿 இதை பின்பற்றுங்கள் அன்பை விட சொத்தே பிரதானம் எனில்

ஆபிரகாமுக்கு உண்டான ஆசீர்வாதம் இயேசு கிறிஸ்துவை விசுவாசிக்கிறவன் களுக்கு உண்டு என பவுல் கலாத்தியருக்கு எழுதினது தான் எழுதினார் அதன் பொருளை சரியாக அறியாமல் ஆபிரகாம் சீமானாயிருந்தது தான் ஆசீர்வாதம் என பலர் நினைத்து ஆபிரகாமை போல பணக்காரானக வேண்டும் என விரும்புகின்றனர்.

(ஆதியாகமம் 13:2
ஆபிராம் மிருகஜீவன்களும் வெள்ளியும் பொன்னுமான ஆஸ்திகளை உடைய சீமானாயிருந்தான்.)

உண்மையில் பவுல் விசுவாசத்தால் நீதிமானாக்கப்படுவதை தான் ஆபிரகாமின் ஆசீர்வாதம் என கூறியிருப்பார்

(கலாத்தியர் 3:8-9,11,14
மேலும் தேவன் விசுவாசத்தினாலே புறஜாதிகளை நீதிமான்களாக்குகிறாரென்று வேதம் முன்னாகக் கண்டு: உனக்குள் சகல ஜாதிகளும் ஆசீர்வதிக்கப்படும் என்று ஆபிரகாமுக்குச் சுவிசேஷமாய் முன்னறிவித்தது.
அந்தப்படி விசுவாசமார்க்கத்தார் விசுவாசமுள்ள ஆபிரகாமுடனே ஆசீர்வதிக்கப்படுகிறார்கள்.
நியாயப்பிரமாணத்தினாலே ஒருவனும் தேவனிடத்தில் நீதிமானாகிறதில்லையென்பது வெளியரங்கமாயிருக்கிறது. ஏனெனில் விசுவாசத்தினாலே நீதிமான் பிழைப்பான் என்று எழுதியிருக்கிறதே.
ஆபிரகாமுக்கு உண்டான ஆசீர்வாதம் கிறிஸ்து இயேசுவினால் புறஜாதிகளுக்கு வரும்படியாகவும், ஆவியைக்குறித்துச் சொல்லப்பட்ட வாக்குத்தத்தத்தை நாம் விசுவாசத்தினாலே பெறும்படியாகவும் இப்படியாயிற்று.)

சரி ஆபிரகாம் எப்படி சீமானானான் என பார்ப்போமா?

ஆபிராமை தேவன் அழைத்தார். ஆபிராம் தன் 75வது வயதில் அழைப்புக்கு கீழ்படிந்து புறப்பட்டார். எங்கே போகிறோமென்று கிளம்பும் போது ஆபிராமுக்கு தெரியாது. ஆனாலும் தேவனை நம்பி புறப்பட்டார். புறப்படும்போது தான் ஏற்கனவே சம்பாதித்த செல்வங்களையெல்லாம் கொண்டுதான் வருகிறாரேயன்றி வெறுங்கையாய் வரவில்லை. ஏற்கனவே சம்பாதித்த பொருட்கள் ஆபிராம் விக்கிரக வழிபாட்டில் இருக்கும் போது சம்பாதித்தவை. ஆபிரகாமை போல பணக்காரனாக வேண்டும் என்பவர்கள் நன்றாக கவனியுங்கள்

(ஆதியாகமம் 12:5
ஆபிராம் தன் மனைவியாகிய சாராயையும், தன் சகோதரனுடைய குமாரனாகிய லோத்தையும், தாங்கள் சம்பாதித்திருந்த தங்கள் சம்பத்தெல்லாவற்றையும், ஆரானிலே சவதரித்த ஜனங்களையும் கூட்டிக்கொண்டு, அவர்கள் கானான் தேசத்துக்குப் புறப்பட்டுப்போய், கானான் தேசத்தில் சேர்ந்தார்கள்.)

ஆபிராம் கானான் நாட்டில் மோரே எனும் பகுதிக்கு வந்து சேர்ந்தான். இதுதான் உன் சந்ததிக்கு நான் கொடுக்கும் தேசம் என்று ஆண்டவர் தரிசனமாகி சொன்னார். உடனே ஆபிராம் அங்கேதானே ஒரு பலிபீடம் கட்டி தேவனை தொழுது கொண்டான்.(ஆதி12:7)

சில நாள் கழித்து ஆபிராமுக்கு ஒரே இடத்தில் தொழுது கொள்வது சலிப்பு ஏற்படுத்தியதோ என்னவோ அங்கிருந்து கிளம்பி இன்னொரு இடத்தில் பலிபீடம் கட்டி தொழ ஆரம்பித்தான். (ஆதி12:8)

மேலும் சில நாள் கழித்து அந்த இடமும் சலிப்பு தட்டியதோ என்னவோ அங்கிருந்தும் கிளம்பி தெற்கு நோக்கி பயணித்து தற்கு நாட்டுக்கே சென்றுவிட்டார். அதாவது ஆண்டவர் காண்பித்த கானான் நாட்டைவிட்டு நெகேவ் எனப்படும் தெற்கு நாட்டுக்கு சென்று விட்டான். கானான் தேசத்துக்குள்ளேயே இடம் விட்டு இடம் மாறும்போது கடவுளை தொழுத ஆபிராமால் நாடு விட்டு நாடு மாறிய போது பலிபீடம் கட்டி தேவனை தொழ முடியவில்லை. (ஆதி 12:9,10)

ஆபிராம் தெற்கு நாட்டில் இருக்கையில் கொடிய பஞ்சம் வந்தது. தற்போது ஆபிராம் விட்டு வந்த கானான் தேசத்துக்கு திரும்பி சென்றிருக்க வேண்டும். ஆனால் ஆபிராம் மறுபடியும் தென் திசையில் பயணித்து எகிப்து நாட்டுக்கு செல்கிறார். காரணம் ஆண்டவர் கொடுத்த கானானை விட ஆபிராமின் பார்வைக்கு எகிப்து தான் செழிப்பாக இருந்தது. (ஆதி12:10)

ஆபிராம் எகிப்துக்கு செல்வதற்குமுன் அவனுக்கு எகிப்து மக்களை பற்றி ‘அங்குள்ளவர்கள் அழகான பெண்ணை கண்டால் அந்த பெண்ணுக்கு திருமணமே ஆகியிருந்தாலும் புருஷனை கொன்றாகிலும் அந்த பெண்ணை அடைவார்கள்’ என்று அறிந்திருந்தான். அங்கே சென்றால் இப்படி ஓரு ஆபத்து இருப்பது தெரிந்தும் ஆபிராம் எகிப்துக்கு செல்ல காரணம் எகிப்தின் செழிப்பு. ஆபிராம் மனைவி சாராயிடத்தில் தன்னை புருஷன் என சொல்லாதே சகோதரன் என சொல் என சொல்லியிருந்தான். தற்போது சாராயின் அழகில் மயங்கும் யாராகிலும் சாராயை மட்டும் எடுத்துக்கொள்வார்கள். ஆனால் ஆபிராமை அவள் புருஷன் என அறியாததால் சகோதரன் தானே என எண்ணி கொல்லமாட்டார்கள். என்ன ஒரு ராஜதந்திரம். (ஆதி12:11-13)

இங்கேயும் குறிப்பிட வேண்டிய காரியம், கானான் தேசத்தில் இருந்தது போல கடவுளை தொழுது கொள்ளும் வழக்கத்தை ஆபிராம் அடியோடு மறந்திருந்தான்.

ஆபிராம் நினைத்தபடி எகிப்து‌ ஆண்கள் சாராயின் அழகில் மயங்கினர். அவளது அழகை குறித்த புகழ்ச்சி எகிப்தின் பார்வோன் வரை சென்றது. பார்வோனும் சாராயை அடைய நினைத்து அரண்மனைக்கு கொண்டு வந்தான். சாராய்க்கு பதிலாக ஆபிராமுக்கு ஏராளமான செல்வங்கள் கிடைக்கிறது. இப்பொழுதாகிலும் ஆபிராம் உண்மையை சொல்லி மனைவியை காப்பாற்ற எண்ணியிருக்க வேண்டும். மாறாக மனைவியை பார்வோனோடு அனுப்பி வைத்து விட்டு பதிலுக்கு பார்வோன் கொடுத்த செல்வ செழிப்பை பெற்றுக்கொண்டான் ஆபிராம். (ஆதி12:16)

2013 ம் ஆண்டு வந்த ஒரு செய்தி ஞாபகத்துக்கு வந்தது. பதவி உயர்வுக்காக மனைவியை உயர் அதிகாரிகளுக்கு விருந்தாக்கிய கணவன். <-click for that news

ஆபிரகாமை போல பணக்காரானக விரும்புகிறவர்கள் ஆபிரகாமுக்கு எப்படி அந்த செழிப்பு கிடைத்தது என்றும் அறிவது நல்லது.

ஆபிரகாம் செழிப்பு மேல் கண் வைத்த போது முதலில் தேவனை மறந்தான். தற்போது மனைவியையும் கொடுத்தான்.

ஆபிராம் உணர்வற்று இருந்தாலும் தேவன் ஆபிராமை தெரிந்து கொண்டதால் ஆபிராமுக்கு உணர்வுண்டாக்கி திரும்ப பழைய கானானுக்கே அழைத்து வர விரும்புகிறார். இதற்காக ஆண்டவர் ஆபிராமோடு முன் போல நேரடியாக பேசவில்லை. மாறாக பார்வோனை கொண்டு பேச வைக்கிறார். பார்வோனுக்கு சில சிக்கல்களை கொடுத்து உண்மை அறிய செய்து பார்வோனை கொண்டு ஆபிராமுக்கு கட்டளை கொடுக்கிறார். (ஆதி12:19)

“உன் மனைவியையும் கூட்டி கொண்டு போ” என்பதே அந்த கட்டளை. இது பார்வோனின் கட்டளையாக இருந்தாலும் இதை சொல்ல வைத்தவர் தேவன். ஆம் ஆபிராம் செழிப்புக்காக எகிப்தில் இருப்பது தேவ சித்தம் அல்ல, மாறாக தேவன் கொடுத்த கானானில் வசிப்பது தான் தேவ சித்தம்.

ஆபிராம் அந்த கட்டளைக்கு கீழ்படிந்து கானான் தேசத்துக்கு திரும்புகிறார். தற்போது பார்வோன் கொடுத்த செல்வங்களும் ஏற்கனவே பழைய விக்கிரக ஆராதனை காரனாக இருந்த போது சம்பாதித்திருந்த செல்வங்களும் சேர்ந்து ஆபிராமிடம் பெரும் செல்வம் இருந்தது.

(ஆதியாகமம் 13:1-2
ஆபிராமும், அவன் மனைவியும், அவனுக்கு உண்டான யாவும், அவனுடனே லோத்தும், எகிப்தை விட்டு, தென்திசையில் வந்தார்கள்.
ஆபிராம் மிருகஜீவன்களும் வெள்ளியும் பொன்னுமான ஆஸ்திகளை உடைய சீமானாயிருந்தான்.)

ஆபிராம் கானானில் தேவன் முதலில் பேசிய இடமாகிய மோரே எனும் இடத்துக்கு வந்தான். தற்போது அங்கே தான் ஏற்கனவே கட்டியிருந்த பலிபீடத்தில் தேவனை தொழுது கொண்டான் (ஆதி13:4). சில ஆண்டுகள் முறிந்திருந்த தேவ உறவு மறுபடி மலர காரணம் திரும்பி வந்ததே. இளைய குமாரன் தகப்பனிடம் திரும்பி வந்ததால் தான் மரித்திருந்த உறவு புத்துயிர் பெற்றது என்று நமக்கு தெரியும் அல்லவா!

உலக கவர்ச்சி தான் நம்மை (ஆபிராமை) தேவனை விட்டு பிரித்தது. தேவனை விட்டு மட்டுமல்ல உலக கவர்ச்சி, பொருளாசை பல வேளைகளில் குடும்ப உறவுகளையும் உதறி தள்ள வைக்கும் (ஆபிராம் தன் மனைவிக்கு பதில் செல்வம் பெற்றானே). மறுபடியும் உலக கவர்ச்சியை, சுய ஆசையை விட்டு திரும்பி வரும்போது தேவனோடு நம்மை இணைக்கிறது. குடும்பத்துக்கும் நன்மை பயக்கிறது.

ஆபிராம் தேவனோடு ஒப்புரவாகி தேவனை தொழுது கொண்டாலும் தேவன் உடனடியாக ஆபிராமோடு பேசவில்லை. ஆபிராமின் மனமாற்றத்தை உறுதிசெய்ய ஆண்டவர் ஒரு சோதனை வைக்கிறார். ஆபிராம் மற்றும் லோத்து பிரிந்து செல்ல கூடிய சூழல் அவர்களது வேலைக்காரர் மூலம் உருவான போது, ஆபிராம் மிகவும் செழிப்பான அதாவது ஏதேன் தோட்டத்தை போல, எகிப்தை போல செழிப்பான சோதோம் கொமேராவை தேர்ந்தெடுக்காமல் அதை லோத்துவுக்கு விட்டு கொடுத்தான். இதிலிருந்து பழையதுபோல செழிப்பை தேடி ஓடும் எண்ணம் ஆபிராமிடம் ஒழிந்து சகோதர பாசத்தை பேணும் எண்ணம் பெருகியிருப்பதை அறியலாம். இந்த சோதனையில் தன்னை நிருபித்த உடனே தேவன் மறுபடி ஆபிராமுடன் பேச ஆரம்பிக்கிறார். (ஆதி13:14)

நான் மனந்திரும்பினவன் என்பதை நமக்கு நிரூபித்து காட்டுவது நமக்கு ஏற்படுகிற சோதனையை மேற்கொண்டு நாம் வெற்றி பெறுவதே.

உலக கவர்ச்சி யில் சிக்கி கொள்ளும் சூழல் அதற்கேற்ற போதனைகள் பெருகியிருக்கிற இக்காலத்தில் அதில் சிக்கி தேவ உறவையும் குடும்ப உறவையும் இழக்காமல் தேவ அன்பில் நிலைத்திருப்போம்.

ஒருவேளை உலக கவர்ச்சியில் சிக்கி தேவ உறவையோ குடும்ப உறவையோ இழந்திருந்தால் மனந்திரும்பி வாருங்கள். ஆண்டவரும் உதவி செய்வார். இழந்த தேவ உறவை மலர செய்ய ஆவலாய் காத்திருக்கிறார்.

மனிதன் இயல்பாகவே என் பெயர் புகழ் பெற வேண்டும் எனும் விருப்பமுடையவன். எல்லோரை காட்டிலும் நான் பெரிதாக காணப்பட வேண்டும் எனும் எண்ணம் இயல்பாகவே இருக்கும். ஆகையால் தான் அநேகர் தங்கள் பெயருக்காக அநேக முயற்சி மேற்கொள்கிறார்கள். இன்று Tiktok, Reels போன்றவற்றில் ஏதாவது செய்து வீடியோ போட காரணமும் எனக்கு பேர் உண்டாக செய்ய வேண்டும் எனும் எண்ணமே ஆகும்.

இந்த பெயர் புகழ் பெறணும் எனும் போதை, தவறு என்று நாம் பேசும் மொழிகளே நமக்கு உணர்த்துகின்றன.
ஆதிமுதல் மக்கள் ஒரே மொழி பேசுகிறவர்களாகத்தான் இருந்தார்கள். நோவாவின் கால அழிவுக்கு பின் பெருகின மக்கள் ஓரிடத்தில் கூடி தமக்கு பேர் உண்டாக வானளாவிய கோபுரம் கட்டும் பணி செய்கின்றனர். ஒட்டு மொத்த மக்களும் ஒரே சிந்தையுடையவர்களாய் தங்கள் பெயர் காலம் கடந்தும் நிலைத்து நிற்க வேண்டும் எனும் தற்புகழ்ச்சி எண்ணமுடையவர்களாய் கூடினர்.

(ஆதியாகமம் 11:4
பின்னும் அவர்கள்: நாம் பூமியின் மீதெங்கும் சிதறிப்போகாதபடிக்கு, நமக்கு ஒரு நகரத்தையும், வானத்தை அளாவும் சிகரமுள்ள ஒரு கோபுரத்தையும் கட்டி, நமக்குப் பேர் உண்டாகப் பண்ணுவோம் வாருங்கள் என்று சொல்லிக்கொண்டார்கள்.)

அப்படியானால் என் புகழுக்காக என் பெயர் விளங்கத்தக்கதாக ஒரு விஷயத்தை செய்ய கூடாதென்றால் எந்த அடிப்படையில் செயல்கள் செய்ய வேண்டும் என்பீர்களாகில் இறைவனுடைய புகழ் விளங்குவதற்கேற்ப செய்ய வேண்டும் என்பேன்

(1 கொரிந்தியர் 10:31
ஆகையால் நீங்கள் புசித்தாலும், குடித்தாலும், எதைச் செய்தாலும், எல்லாவற்றையும் தேவனுடைய மகிமைக்கென்று செய்யுங்கள்.)

மட்டுமல்ல இறை நம்பிக்கையை அல்ல அதீத சுய நம்பிக்கையை உடையவர்களாய் இருந்தனர். நாங்கள் செய்ய நினைத்த ஒன்றும் தடைபடாது. இன்னொரு வகையில் சொல்ல வேண்டுமானால் எங்களை யாராலும் தடுக்க முடியாது ஏன் கடவுளால் கூட தடுக்க முடியாது எனும் பெருமை பிடித்த எண்ணம் காணப்பட்டது.

(ஆதியாகமம் 11:6
…தாங்கள் செய்ய நினைத்தது ஒன்றும் தடைபடமாட்டாது என்று இருக்கிறார்கள்.)

இதே வேளையில் இந்த சுய நம்பிக்கைக்கு எதிரான யோபுவின் இறை நம்பிக்கையை கவனிப்பது நலம்

(யோபு 42:2
தேவரீர் சகலத்தையும் செய்ய வல்லவர்; நீர் செய்ய நினைத்தது தடைபடாது என்பதை அறிந்திருக்கிறேன்.)

வித்தியாசத்தை கவனித்தீர்களா?

இதே வேளையில் சுய நம்பிக்கை குறித்த உலக மனிதராகிய திருவள்ளவர் எழுதிய குறள் கூறுவதற்கும் வேத சத்தியத்துக்கும் உள்ள வித்தியாசத்தை காண்பிக்க விரும்புகிறேன்

திருக்குறள் 619
தெய்வத்தான் ஆகா தெனினும் முயற்சிதன்
மெய்வருத்தக் கூலி தரும்
(பொருள்: தெய்வத்தின் அருளாலே கைகூடாது போனாலும், ஒருவனுடைய முயற்சியானது, தன் உடல் வருத்தத்தின் கூலியைத் தப்பாமல் தந்துவிடும்)

நீதிமொழிகள் 3:5-6
உன் சுயபுத்தியின்மேல் சாயாமல், உன் முழு இருதயத்தோடும் கர்த்தரில் நம்பிக்கையாயிருந்து,
உன் வழிகளிலெல்லாம் அவரை நினைத்துக்கொள்; அப்பொழுது அவர் உன் பாதைகளைச் செவ்வைப்படுத்துவார்.

இரண்டுக்கும் வித்தியாசம் புரிந்திருக்கும் என நம்புகிறேன்.

நாங்கள் செய்ய நினைத்தது தடைபடாது என்ற எண்முடைய அன்றைய மக்களை போல தான் பெரும்பாலான மக்கள் இன்று உள்ளனர் தங்களிடம் உள்ள வளங்களின் அளவீட்டை பொறுத்து.

இன்று பல கிறிஸ்தவ ஆலயங்கள் கூட எங்கள் பெயர் விளங்க பண்ண வேண்டும் அல்லது பெயர் நிலைத்து நிற்க வேண்டும் என்ற நோக்கில் தான் கட்டப்படுகிறது. ஆகவே தான் 100 கோடி எனவும் இதுவரை யாரும் கட்டியிராத மாடல் எனவும் அவர்களால் தம்பட்டம் அடிக்க முடிகிறது. இது வெறும் ஆலயங்களுக்கு மட்டுமல்ல ஒவ்வொரு தனிமனிதனுடைய வாழ்விலும் கூட நடக்கலாம். நான் செய்யும் எந்த செயலும் என் பெயர் விளங்க செய்கிறேனா மற்றும் நான் எதை செய்ய நினைக்கிறேனோ அதை யாராலும் தடுக்க முடியாது என்ற எண்ணமுடையவனாயிருக்கிறேனா என சிந்தித்து பார்ப்பது நலம்.

உதாரணத்துக்கு ஒரு வீடு கட்டுகிறேன் அல்லது வாகனம் வாங்குகிறேன் என்றால் இந்த ஊரில் என் பெயர் விளங்கத்தக்கதாக செய்கிறேனா அல்லது என் தேவையின் அடிப்படையில் செய்கிறேனா என சிந்திப்பது அவசியம்.

அதுபோல என்னிடம் இவ்வளவு செல்வாக்கு இருக்கிறது அல்லது இவ்வளவு பணம் பொருள் சொத்து இருக்கிறது ஆகையால் நான் எதை எப்போ நினைத்தாலும் செய்ய முடியும் என்ற‌ எண்ணமுடையவனாயிருக்கிறேனா அல்லது தேவன் தான் சர்வ வல்லவர் அவர் செய்ய நினைத்தது மட்டுமே யாராலும் தடுக்க முடியாது. அவருடைய சித்தத்தை தான் நான் செய்ய வேண்டும் என்ற எண்ணமுடையவனாயிருக்கிறேனா என்று சிந்திப்பது அவசியம்.

எனது பெயர் விளங்க செய்யும் காரியமும் நான் நினைத்தை யாராலும் தடுக்க முடியாது எனும் எண்ணமும் தேவனுக்கு எதிரானவை.

ஆகையால் தான் இந்த எண்ணத்தின்படி செயல்பட்ட மக்கள் கட்டிய கோபுர வேலை தொடர்ந்து நடக்காதபடி தேவன் இறங்கி ஒரே மொழி பேசிய மக்களின் மொழிகளை தாறுமாறாக்கி பல மொழிகளாக்கி ஒருவர் பேசுவது பிறருக்கு புரியாதபடி செய்தார். தவறான எண்ணத்தோடு கூடியிருந்தவர்களை சிதறடித்தார்.

(ஆதியாகமம் 11:7-9
நாம் இறங்கிப்போய், ஒருவர் பேசுவதை மற்றொருவர் அறியாதபடிக்கு, அங்கே அவர்கள் பாஷையைத் தாறுமாறாக்குவோம் என்றார். அப்படியே கர்த்தர் அவர்களை அவ்விடத்திலிருந்து பூமியின்மீதெங்கும் சிதறிப்போகப்பண்ணினார்; அப்பொழுது நகரம் கட்டுகிறதை விட்டுவிட்டார்கள். பூமியெங்கும் வழங்கின பாஷையைக் கர்த்தர் அவ்விடத்தில் தாறுமாறாக்கினபடியால், அதின் பேர் பாபேல் என்னப்பட்டது; கர்த்தர் அவர்களை அவ்விடத்திலிருந்து பூமியின்மீதெங்கும் சிதறிப்போகப்பண்ணினார்.)

இன்று உலகில் உள்ள பல மொழிகளை காணும் நமக்கு இந்த உண்மைகள் எப்பொழுதும் நிலைத்திருக்க கடவது

1) என் பெயர் புகழுக்காக செய்வேன் என்பதல்ல தேவனுடைய நாம மகிமைக்காகவே செய்வேன் என்பதே
2) நான் நினைத்தது தடைபடாது என்பதல்ல தேவன் நினைத்தது தடைபடாது என்பதே